6 月 19 日，九龍城裁判法院，裁判官黃國輝宣讀判決，判阻差辦公罪成的被告何永隆 160 小時社會服務令。
罪成後一度還押候判的何，總算恢復自由身。他踏出法庭，雙手合十向聲援者道謝、連連鞠躬。
陷獄 12 天，何永隆盡現疲態，平時用髮蠟梳得整齊的頭髮，沒精打采垂在額頭上。記者們追訪，感受如何？有沒有什麼話想說？何笑說，畀我返屋企唞兩日，有咩遲啲再講。惟他堅定留下一句，幾乎想也不用想：一定上訴到底。
2020年6月19日，何永隆離開法庭
何永隆被控於去年 8 月 5 日「三罷」當晚，在深水埗以身阻擋警長馮耀彤截查一名少年，疑似向被截查者叫「走呀」，少年逃逸，何則當場被捕。
案件共審訊了三天，至 6 月 8 日，裁判官黃國輝最終裁定，認為何永隆是故意橫行走向馮耀彤及少年之間，他又認為警長當時有合理理由作截查，並非辨方所指「發晦氣」，裁定何永隆阻差辦公罪成。黃官裁決時就明言，警長因何永隆阻攔錯失調查機會，案情嚴重，法庭有機會判處被告即時監禁。
故事流露的俠義，吸引了傳媒目光，不少記者爭相邀約訪問。但何永隆總是對記者說，自己只是個粗人，要說的觀點都說過了，他一個人的案件，到底有什麼大不了？他又不解，明明情節不複雜，控方何必將案件押後再押後？辯方又何必勞師動眾，派這麼多律師處理他一個？
「我覺得，係燒緊基金啲人錢囉.... （被捕）人數唔少㗎，都相信陸續有嚟。」
捲入刑事程序之前，何永隆在荃灣某商場當夜班清潔工，工作時間晚上 10 時半至早上 7 時，但法庭頒下凌晨 12 時至早上 6 時的宵禁令，唯有轉工。不過何是自在的人，平時的薪水都是左手來、右手去，加上未算最底層的清潔工種，他未算太擔憂。
「份工俾我嘅嘢，我係咪出面又唔係揾唔到，無咗份工咪無咗份工囉，怕鬼你啊？」他爽朗大笑，露出被香煙燻黑的牙齒，「你俾到我嘅，係我 90 年代嗰時揾嘅錢咩·？又唔係。唔係你就收聲啦！」
訪問時案件還未裁決，問他會否擔心結果，他搖頭，老是強調一句：「我自己又唔係咩好人…太擔心又唔會…」
「我雖然唔係好人，但我都會知，有啲嘢，你該做；有啲嘢，你唔應該做。」
被裁定罪成後，辯方律師求情時透露，何永隆過往曾留案底，不過對上一次已是 2014 年的事情，律師又提及，何 20 年前始受情緒問題困擾，至今仍需定期前往精神科複診。
無論在制度或日常裡，何永隆一直生活在邊緣。
訪問中，何永隆總是有意無意強調，自己少年時無心向學，才小學六年級畢業，已終日流連街頭「喴 wet」，群上江湖人物揾食，多年前已經常進出差館。八九十年代香港經濟起飛，他笑言自己當年賺的錢，比一個在金鐘上班的白領還要多。最近經濟差，何永隆有時會想起九十年代的香港，那個心目中的黃金時代…
說起為何參與反送中運動，他的原因幾乎只有一個：不忍看著優秀的年輕人犧牲。
「我仲有 4 個月都 51 歲啦，我有咩犧牲啫？我依挺奀挑鬼命，都唔方長命㗎啦！怕你咩？」
「我經歷過香港最好嘅時代，但佢哋人生啱啱先準備開始。」
何永隆
* * *
嗰時真係好好揾
常言六、七十年代是談理想主義的火紅年代，八十年代則是經濟起飛後，無可救藥的璀璨繁華。在那「魚翅撈飯」的時代，除了八九年北京民運，何永隆對那些年的政治事件，沒有多少深刻記憶。
1989 年 5 月 28 日， 150 萬港人參與「全球華人大遊行」聲援北京絕食學生，下午 2 時由遮打道出發，遊行至維多利亞公園繼續集會，一直至晚上 10 時才結束，20 歲的何永隆也在人群當中，參與人生中第一次遊行。
波瀾壯闊的運動，六日後在軍隊屠城下落幕。曾經的民主理想懸擱於空中，落地生根前破滅。何永隆同年入行做清潔，過著上班賺錢吃喝的日常。雖然當年的六四記憶猶新，但何說，畢竟地理上有段距離，加上他一不碰政治、二不碰股票，九十年代在他記憶中，只是「有錢齊齊揾」的美好年代。
「嗰時真係好好揾㗎，我 20 歲到 30 幾歲嗰時，我又撈過賭船啦。無辦法啦，我哋又無專業技能 — 錢太容易揾啦，社會風氣都 okay…」他笑起來，有點尷尬。
「嗰時最鍾意就係成班 friend 圍埋一齊，成日去花天酒地啊，去夜總會啊，過澳門啊。」
當年眼見九七大限將至，不少香港人選擇移民海外。何永隆直言，自己當時對移民「諗都無諗過」。今日回想，只覺唏噓。
「我發夢都無諗過香港會有咁嘅一日，相信好多香港人都係咁。所以你話 97 年嗰時 — 其實無特別深刻印象。」他苦笑。
何永隆再次關注社會和政治，是 2014 年佔領運動。他常說自己懶、又特立獨行，不喜歡長期待在佔領區，但如果有人去「搞事」，他總會去幫拖。當年聞說有黑道人士到旺角佔領區拆路障，何永隆也是義不容辭。
「我接受到唔同嘅意見，但你唔好郁手郁腳，就係咁簡單，」他憤然。
「我細個喺環頭環尾，都係周圍撩事鬥非，蝦蝦霸霸，但一定唔會恰老弱婦孺！我哋恰都係恰比我哋高大嘅。我最憎人恰老人家、恰細路，恰女人，就係咁！」
去年，何永隆本身沒有留意《逃犯條例》修訂的新聞，促使他參與反送中的原因 — 和不少參與運動的市民一樣，也是源於目睹 7.21 元朗站襲擊事件，警方懷疑與黑幫勾結。
「本身見到有示威、衝突，我覺得都好小事嘅，但你去到（721）咁 — 我覺得，吓？！ 仲成世界嘅？黑社會大晒？」
「我成世人都無入過幾多次元朗。但睇到 721 之後，727 真係點都要入元朗。」
7月27日元朗衝突（立場新聞圖片）
咁我都要當睇唔到？
何在中環士丹頓街的唐樓長大，唐樓幾年前被申請清拆重建，改建成豪宅，過幾個街口就是翻新成美術館的「大館」，以前是中區警署。
何永隆少時，出入警署是常事，但他笑言，自己以前對警察印象還算不錯，「最多拉你埋一邊打兩錘啫，但都好小事！」
「嗰時啲反黑啊，成日嚟撩我哋，有時仲會拉我哋返去，不過就算拉咗我哋返反黑組，都係打電話叫我哋啲大佬出來咋嘛…我自己都唔係善男信女，我唔驚差佬…」他在笑。「但都係睇人食嘅啫，我自己有一定的經驗，差佬好好招呼。但我見（警察）對住啲後生，就唔係啦，不論係行為上、言語上，都係極盡仆街 — 打、嚇、氹。」
「但你見到依家發生嘅事，同我嗰時相比，完全係兩樣嘢嚟嘅。依家個環境，我都驚 … 一個正常、有血性嘅人唔會做嘅嘢，佢哋（警察）全部做晒，大家有眼見。」
本案審訊時，從呈堂的錄影片段可見，案發時現場警員和市民曾經互罵，包括涉事警長馮耀彤曾侮辱一名女士是妓女，之後警員就朝市民衝前，並發生何永隆被捕一幕。何的辯護律師結案陳詞時就質疑，警員當時只是不甘被辱，為「找晦氣」而截查少年身份。
何永隆的代表律師又認為，控方必須證明何當時知道警員正在「正當執行職務」，如果警員正在濫權，被告去阻止他實屬合理辯解，因為沒有一條法例會旨在保障濫權的警察。
不過裁判官黃國輝裁決時，幾乎一面倒接納警長證人馮耀彤說法，認為該名少年曾用手指向警員並說話，警長懷疑少年參與非法集結圖作截查「並非無的放矢」，被告行為無疑構成阻礙。黃官又認為，馮耀彤明知現場有同袍拍攝，不相信他會誣告被告。
當天聞判後，辯方律師向法庭申請休庭 5 分鐘，以便索取指示。何永隆憤怒地奪門而出。
何在訪問中不住強調，自己讀書少，不懂什麼法律，但還知道是非黑白。「控方話，只要係警察，佢做緊任何嘢，你都唔可以阻佢嘅，咁但如果佢做緊嘅嘢唔恰當，咁點呀？我都要當睇唔到？」
「我讀到小學六年班啫，但我都知道，如果見到（有唔啱嘅嘢）要幫下手啊，盡一個市民嘅責任 — 點解依家會變咗係錯嘅呢？」
2020年5月27日，旺角被捕者
辛苦咗啲細路
除了路見不平，何永隆參與運動的另一個原因，是對年輕人的愧疚。訪問前一日，再傳出有多十數人因涉 11 月在油尖旺一帶「營救理大」，被捕半年後遭落案控告暴動，其中包括經營 Youtube 頻道的商人易卓邦（Auman）。被落案後，易在 Facebook 撰文，嘆問一句「未來為何物」？
何永隆問了記者好幾次，易的案件何時提堂？東區裁判法院，是西灣河那邊嗎？
「香港咁多後生仔，犧牲自己去救人。我喺現場都見好多。俾老嘅、嫩嘅走先，自己最後先走嘅，或者自己係咁俾人（警察）扑，都（保護其他人）唔縮手。」
「係見到好多依一代嘅後生，個個都……捨己為人，係真係睇到。我自己同一年紀嘅時候，根本一塌糊塗，胡胡混混。」
何原本被控《簡易程序治罪條例》下的「阻礙警務人員執行職務」罪，其後律政司修改控罪為《侵害人身罪條例》下「意圖犯罪而襲擊或襲警等」罪，案情內容不變，但罪成的罰則，由原控罪最高罰款 1,000 元及監禁 6 個月，變成最高可處監禁兩年。
「但我條 charge （控罪）無佢哋咁緊要啦，因為始終，佢哋大碌好多…係辛苦咗啲細路啦...」
何永隆坦認，如果可以選擇，寧願這場運動沒有發生過。「我哋無咗咁多後生仔，係咪先？我覺得……佢哋係好叻，係香港嘅將來。」
他抽一口手中香煙，嘆氣。「你話依個世界係幾唔公平。」
乜撚嘢黑暴？
反修例運動爆發至今一周年，香港市民群起抵抗一條惡法，雖然成功逼使政府暫緩修訂，卻換來 9,000 人被捕、600 人被控暴動，及一條更惡的惡法。監警會上月發表審視報報告，內容被質疑淡化警暴問題，卻成為政府定義為「香港的真相」。
或如《1984》作者 George Orwell 所言：「誰控制了過去，就控制了未來；誰控制了現在，就控制了過去。」
何永隆直言，年少時習慣蝦蝦霸霸，多年來生活還算過得去，從未感受過向今天般赤裸的壓逼。
「我由細到大，未試過咁樣俾人撳住打！有得還拖嘅，你打死我都無嘢講，俾人撳住嚟砌，無得還手，係好慘。」
「乜撚嘢『黑暴』啫？！你啲速龍就黑暴！你啲防暴就黑暴！」
何是樂得自在的人， 平時上班上一天不上一天，薪水夠交租吃飯就好，最近放假有時會去法庭旁聽其他抗爭者案件。他以前閒時也會去大嶼山行山，但近日不論工作或休息，都提不起勁。
「有時又無心機啊... 即係覺得，唉，個世界咁樣啦，唔想返啦，有得食就算啦！」
「依場運動之前，我都係返工望放工，放工望出糧，假期就 plan 下去邊度旅行、去邊度玩……我份人鍾意簡單，唔想諗咁多，最好嘻嘻咔咔就一日…」
「依家點解好似咁困難嘅呢？」
9月21日，屯門，甚少見到示威者出現在樹林裏。
我可以點？
在香港，人人被教育要為未來做準備，入幼稚園前要上面試班、讀書時要規劃升學就業、工作時要預備退休。但過去一年，不少港人的日常如被硬生生中斷。看到無日無之的濫捕濫告，甚至網上流傳多宗「被自殺」傳聞，何永隆經常在想，如果連明天的事都無法預料，談何計劃未來？
他早前已寫好「平安紙」，交託朋友保管。訪問當日，他從唐樓天台俯視樓下街道，說自己絕不會自殺，「雖然平日從事高空工作，但你要我喺度跳落去，我真係唔敢。」
「我更加無可能跳海，我細個一口氣就可以游出浮台，依家最多係唔係好夠氣，要游返轉頭。」
何永隆父親是大馬華僑，1969 年馬來人與華人發生嚴重種族衝突，巫統政府 1970 年推行優惠馬來人的新經濟政策，何永隆 5 歲時隨家人移民香港，在他心目中，馬來西亞只是個不存在的故鄉。
「我屋企一定係香港，叫我返大馬，我都係當去旅行嘅啫，但長遠嚟講，我梗係想留喺香港啦。」
「我最尾，其實有咩選擇呢？其實無，心中有數㗎喎。」
何永隆現居深水埗唐六樓劏房，搬來時月租 2500 元，住了 7 年沒有搬過，現時加租加到 5,200。他說，50 歲人，越來越懶，一動不如一靜，早幾年輪候過公屋，但不想搬離原區，搞著就沒有了這回事。他平時吃飯都只去樓下那間茶餐廳，過幾個街口，都很少走過去。
「如果唔係無得揀，都唔想改變。」
但家人始終是最大牽絆，他不是沒有想過移民。「唔捨得係一定會，我香港大㗎嘛，但正如我所講，我有顧慮，我個『顧慮』話我聽：如果你唔走，我都唔走…」
「咁我可以點？」
一根煙燒盡，何再點起一根。他忽然說，平時很少上來天台，這裡的風景真美。
「其實香港真係真係一個好好嘅地方。」
文／梁凱澄
June 19, 2020 at 04:09PM
https://ift.tt/2YghD3Y
【專訪】清潔工以身阻警截查少年罪成「我唔係咩好人，但識分是非黑白」 | 立場人語 - 立場新聞
https://ift.tt/30OSyi9
No comments:
Post a Comment